ഉറവകളെ തടയരുതേ

ഉള്ളിന്റെ രഹസ്യങ്ങളിലെവിടെയോ, അണകെട്ടിനിർത്തിയ നീർച്ചാലുപോലെ ദൈവജീവന്റെ ഉറവകളുണ്ട്. തിരസ്കരിക്കപ്പെടുന്ന മഴപോലെതന്നെ, തടഞ്ഞുവയ്ക്കുന്ന ജലസ്രോതസ്സും ആഴങ്ങളിൽ വരൾച്ച ഉണ്ടാക്കുന്നുണ്ട്. ഉപവാസവും ദാനധർമ്മവും ഈ തടയണകൾ തുറക്കാൻ ബലം നൽകണം. മേഘങ്ങൾ പെയ്തിറങ്ങണം. കൃപാമേഘങ്ങളും മഴത്തുള്ളികളെപ്പോലെ മണ്ണിനു നനവ് നൽകാൻ വീണുതുടങ്ങുന്നു. എവിടുന്നൊക്കെയോ ഏതൊക്കെയോ കൃപാരുവികളാണ് ചെറുതും വലുതുമായ തടയണകളിൽ തടഞ്ഞുവച്ചിരിക്കുന്നത്?

ജീവനുള്ളവരാകാം.....

ആത്മാർത്ഥമായ ഒരു ദാഹം: എനിക്കും ക്രിസ്തുവാകണം, ഒരു നിമിഷത്തേക്കെങ്കിലും
സകലമാന ജീവതന്ത്രികളിലും കൃപ ഒഴുകിയെത്തുന്ന നിമിഷം - പുതിയ മനുഷ്യനാകും. സകലതും പകർന്നു നൽകുന്ന ഒരു ജീവിതത്തിൽ മരണം പോലും സ്വയം നല്കലാകും.

ആദമായി  ഉറങ്ങിയ ഞാൻ ക്രിസ്തുവായി ഉണരും - സകല ചരാചരങ്ങളെയും കണ്ട് അപ്പോൾ നിറഞ്ഞ ഹൃദയത്തോടെ പറയാം: ഇതാ എന്റെ അസ്ഥിയുടെ അസ്ഥിയും മാംസത്തിന്റെ മാംസവും... പൂക്കളിൽ, പക്ഷികളിൽ, മഞ്ഞുകണങ്ങളിൽ, നക്ഷത്രങ്ങളിൽ, ബന്ധുക്കളിൽ, അപരനിൽ, ദരിദ്രനിൽ, ദോഷസ്വഭാവക്കാരിൽ.